Dangos 57680 canlyniad

Cyhoeddwyd yr Atlas Cymraeg ym 1987 o dan nawdd Cynllun Gwerslyfrau ac Adnoddau Cyd-Bwyllgor Addysg Cymru, yn addasiad Cymraeg o Philips' Certificate Atlas for Secondary Schools (1979). Bwriad y prosiect oedd i gynhyrchu atlas safonol a chynhwysfawr yn y Gymraeg, ac hefyd i gynrychioli enwau lleoedd tramor yn eu priod ieithoedd lle nad oedd ffurf Gymraeg i gael, yn ymwybodol o ddylanwad grymus yr iaith Saesneg. Dechreuwyd y gwaith ym 1979, pan sefydlwyd Panel Atlas i oruchwylio'r prosiect, gydag Is-Banel a Gweithgor i wneud y gwaith manwl. Rhannwyd y gwaith fesul tudalen fel arfer, a gwnaethpwyd nifer fawr o ddrafftiau o'r testun wrth i'r testun gael ei olygu gyda chrib mân. Cadeirydd y Panel a Golygydd yr Atlas oedd Dafydd Orwig, a chwmni George Philip a'i Fab, Llundain, oedd yr argraffwyr.

Cwmni cyhoeddi a leolwyd ym Mhenygroes, sir Gaernarfon, ar ddiwedd y 1970au a'r 1980au, oedd Cyhoeddiadau Mei. Y rheolwr oedd Dafydd Meirion o Benygroes. Cyhoeddai llyfrau Cymraeg i oedolion a phlant a rhai ar hanes lleol. Caeodd y busnes yn 1993 oherwydd problemau ariannol.

Roedd Cylch y Pump ar Hugain yn gymdeithas llenyddol yn Lerpwl. Fe'i ffurfiwyd yn 1932 a pheidiodd â bod yn 1981.

Mae Cymdeithas Bob Owen yn gymdeithas i lyfrgarwyr a chasglwyr llyfrau yng Nghymru. Fe'i henwyd ar ôl Bob Owen (1885-1962), Croesor, Sir Feirionnydd, hanesydd a chasglwr llyfrau. Sefydlwyd y Gymdeithas yn Eisteddfod Genedlaethol Aberteifi yn 1976. Prif weithgaredd y Gymdeithas yw cyhoeddi'r cyfnodolyn, Y Casglwr, a gyhoeddwyd gyntaf ym mis Mawrth 1977, gyda John Roberts Williams yn olygydd arno hyd 1995.